Минзәлә
  • Рус Тат
  • Чират кайчан җитәр?

    Шәһәребезнең Тукай урамы,55 нче йортында яшәүчеләр әнә шулай дип йортларының тузуыннан зарланалар.

    Күптән түгел редакциягә әлеге йортта яшәүчеләр исеменнән Галина Иванцова хат калдырып киткән иде. Анда мондый юллар бар: "Без шәһәребезнең Атлар мәйданында Тукай урамы, 55 нче йортта яшибез. Күрше-тирәбездә йортлар иске, әмма безнең йортыбыз алардан да искерәк, 1965 елгы. Әмма башка йортларга капиталь ремонт ясалса да, безнеке ни өчендер читтә кала. Капремонт программасына йортлар нинди принциптан чыгып кертелә икән, шуны беләсебез килә. Ул дымоходларның да кайчаннан бирле алыштырылганы юк иде. Узган ел җәен подъезд янындагы бер дымоход килеп төште, ярый әле якында кеше булмаган. Шуннан соң икесен алыштырып куйдылар. Йортның түбәсен дә алыштырырга иде. Дөрес, бер елны көчле җил-давыл булганнан соң, түбәне ашык-пошык алыштырып куйганнар иде, шуннан бирле бер ремонт күргәнебез юк".

    Дөресен генә әйткәндә, бу йорттагыларның беркая да мөрәҗәгать иткәннәре булмаган, шул исәптән Идарәче компаниягә дә. Беренче адымны алар ни өчендер бездән, редакциядән, ясарга булганнар. Хәер, әле бу хатны китермәгән дә булырлар иде, йортларында соңгы вакытларда берничә тапкыр су бирүне туктатып торганнар. Өстәвенә йортлары янында бозлавык хасил булган. Авария службасына хәбәр иттегезме, дип соравыма да "Юк" сүзен ишетергә туры килде. Капремонт бер көндә хәл ителә торган мәсьәлә түгел, ә менә сусызлык кыен. Шуңа күрә ситуациягә ачык-лык кертү өчен "Коммуналь челтәрләр" ААҖнең су үткәрү-канализация хуҗалыгына шалтыраттык. Рәшит Шәйсу-варов аңлатуынча, хәл болайрак булган: "Әлеге йортта яшәүчеләр телефон элемтәсе югалгач, элемтәчеләргә хәбәр иткәннәр. Шушы тирәдәге тузган суүткәргечләрдән су агып ята дип кем уйлаган. Җир астындагы өзеклекне табу өчен элемтәчеләр соравы буенча су бирүне дә туктатып торырга туры килгән. Суыртылган суны каядыр читкә түгел, бер эшче гаебе белән йорт янына гына агызып җибәргәннәр, нәтиҗәдә йорт янында шугалак хасил булган. Тузган суүткәргеч линияләрне ремонтлауга килгәндә, "Әлеге эшне җир кардан арынгач башлаячакбыз", диде Рәшит Михайлович.

    Реклама

    Капремонт мәсьәләсе буенча "Минзәлә идарәче компания" ҖЧҖ җитәкчесе Равил Харазовтан мондый җавап алдык: "Әлеге йорт тирәсендәге Тукай урамы, 59, 68, Пролетарская урамы, 46, Пионерская урамы, 41 кебек йортлар 185 нче ФЗ буенча капремонт программасына шуның өчен алданрак кертелгәннәр, әлеге йортларның канализация системалары яраксыз хәлгә килгән, йортларның периметры буенча отмосткалары эштән чыккан, подъездларның козыреклары да тузып беткән. Әлбәттә инде, әлеге йортларда яшәүчеләрнең безгә язмача мөрәҗәгать итүләре дә истә тотыла. Ә теге яисә бу йортны исемлеккә кертү мәсьәләсе дәүләт торак инспекциясе, шәһәр Советы, Идарәче компания вәкилләре катнашындагы комиссия тарафыннан хәл ителә. Капремонт программасына керү өчен әлеге йортта яшәүчеләрнең «капремонт өчен» түләүләрне вакытында түләп барулары да искә алына. Шул ук вакытта барлык йортларга да берьюлы капремонт ясау мөмкин түгеллеген дә аңласагыз иде. Шуны билгеләп үтәсе килә, Тукай урамы, 55 нче йортны 2014 нче елгы капремонт исемлегенә кертү күздә тотыла».

    Менә шундый хәлләр, без әлеге йортта яшәүчеләрнең теләкләре менә шул рәвешле чынга ашар дигән ышанычта калабыз.

    Нравится
    Поделиться:
    Реклама
    Комментарии (0)
    Осталось символов: