Медицина хезмәткәрләренә респираторлар килде

(Минзәлә, 3 ноябрь, Флүрә Мусина, “Минзәлә-информ”)

Covid-19 дан саклану өчен Татарстаннан РФ Дәүләт Думасы депутаты Әлфия Когогинадан Минзәлә районы медицина хезмәткәрләренә ике тартма –400 данә респиратор килеп иреште. Депутат Минзәлә районының сәламәтлек саклау һәм социаль өлкәдәге хезмәткәрләре адресына Рәхмәт хаты да юллаган, анда мондый юллар бар:

“...Сезнең хезмәтегез һәм һөнәри осталыгыгыз өчен тирән рәхмәтемне җиткерәм! Үзегезне һзм якыннарыгызны саклавыгызны үтенәм, сезгә ихлас күңелдән сәламәтлек һәм игелек телим”.

Безнең өстәмә

Депутат исеменнән китерелгән респираторларны район үзәк хастаханәсе баш табибы Наил Мөбәрәкшин, баш шәфкать туташы Ләйлә Нуртдинова кабул итеп алды. Шундый ук күләмдәге респираторлар Актаныш район үзәк хастаханәсе вәкиленә дә тапшырылды.

Исегезгә төшерәбез, 30 октябрьдә Минзәлә район үзәк хастаханәсендә региональ госпиталь ачылды. Бүгенге көндә анда 9 авыру ята.