Бигрәк тә мәшәкатьле заманда яшибез инде, ай ахыры җиттеме, ул счет-квитанцияләр берсе артыннан-берсе килеп кенә тора. Шуларны алуга тизрәк түләргә тырышасың, чөнки бурычлылар рәтендә йөрисе килми.
Беркөнне, электр энергиясенә квитанция килгәч, шуны түләргә дип почтага киттем. Субсидия бирү вакыты җитмәгәч, биредә уш китәрлек чират-мазар юк, миннән алда ике-өч кеше генә бар иде. Шул арада миннән артта килгән бер апа сумкасыннан газ буенча квитанциясен алып, зарланырга тотынды. Күренеп тора, кәефе кырылган моның. "Бер ялгызым яшим. Ноябрь ахырында газга квитанция алгач,тәннәрем чемердәп китте - каян алганнар мондый саннарны. Айга уртача 500 сум түләп килә идем, бу юлы 1,5 мең сумнан да артыгракны язып җибәргәннәр. Күрсәткечләргә карап, түләүне исәпләдем, шуны түлим менә",диде ул эчен бушатып. Бер-ике көннән соң безгә дә газ буенча квитанция килде. Җәйге-көзге чордагы мәшәкатьләр белән соңгы айларда ничек язып җибәргәннәр түләү суммасын, шулай түләп килгән идем. Бу юлы квитанцияне алгач, почтадагы апаның борчылуы искә төште, туктале, мин әйтәм, квитанцияне мин дә җентекләбрәк карыйм әле, дим. "Итого к оплате" дигән графага "йомры" гына саннар тезеп куйганнар. Үткәнендәге квитанцияне алып чагыштырып карыйм: 500 сумга якын түләгәнмен, ул айдагысында да, бу юлы килгән квитанциядә дә счетчик күрсәткечләре бер үк төрле язылган. Счетчикны карасам, әлеге күрсәткечкә яңа җитеп киләбез. Әле күп яндырмаганбыз икән газны дип тынычланып куйдым. Аннары уйга калдым: күрсәткечләр шул ук булгач, бу айда нәрсә өчен түләргә тиеш булам соң әле? Бераздан башыма барып җитте - үзебезнең дә гаеп бар икән ләбаса! Сәбәбен ачыкламый торып һәр ситуациягә ашыгып нәтиҗә ясарга яратабыз шул, аннары кемгәдер үпкә белдерәбез. Югыйсә, һәр квитанциядә абонентларны кисәтеп, фатирда яшисеңме, шәхси йорттамы, айның башында, 1сеннән 10 нчы числога кадәр, газ стчетчигының күрсәткечен газ службасына хәбәр итәргә тиеш булуыбыз хакында мәгълүмат биреп барыла бит. Күрсәткечне бирмисең икән, түләүләр газ плитәсенә һәм җылытылучы мәйданга бәйле рәвештә, норматив буенча исәпләнәчәк, әмма киләсе айда, күрсәткечеңне хәбәр иткәч, кабат исәпләү ясала. Шәхсән мин үзем, бу юлы норматив буенча түләргә килгән квитанция нигезендә түләргә ашыкмадым, күрсәткеч буенча түләдем. Беренчедән, кайбер абонентлар кебек айлар буе түләмичә йөргән юк, икенчедән, бу ай бетмәгән әле, өченчедән, түләүләрне алдан, әле файдаланмаган газ өчен арттырып түләп куясы да килми.
Сүз дә юк, поставщикларның - бу очракта газ службасының хәленә дә кереп була. Аларга да түләүләрне вакытында җыеп барырга кирәк шул. Шушы максаттан андагы хезмәткәрләр кварталга бер тапкыр өйдән-өйгә йөреп счетчик күрсәткечләрен үзләре җыя. Әмма аларга (башка службаларга да) бер кыенлык белән бик еш очрашырга туры килә: кайберәүләр бу служба вәкилләренә ишекләрен ачарга бик атлыгып тормыйлар. Эшләре счетчик тикшерү генә түгел бит әле, газ җиһазларының төзеклеген, дөрес эксплуатацияләнүен тикшереп тору кебек бурычлар да йөкләнгән бит аларга. Иң уңайлы юл - счетчикларның күрсәткечләрен без, абонентлар, үзебез биреп барсак, аңлашылмаучылык булмас иде. Су буенча күрсәткечләрне айныкын айга бирергә өйрәттеләр, күбебез өйрәнде. Газ буенча да өйрәнер вакыт җитте, димәк. Кыенлыгы да юк инде бер карасаң, күрсәткечләрне эш вакытында 3-44-65 телефоны буенча хәбәр итәсе, 3-44-88 буенча эштән соң да алалар. Бары тик телефоннары гына бүгенге көннәрдәгечә һәрдаим "занят" булмасын иде.
Иң мөһим һәм кызыклы язмаларны Татмедиа Telegram-каналында укыгыз
