Шаман думбрасына биеп татар классикасын күрсәтеп буламы?!
Кәрим Тинчуринның “Сүнгән йолдызлар” әсәрен сәхнәләштереп, Калмыкстаннан килгән режиссер Баатр Колаев Минзәлә татар дәүләт драма театры артистларының осталыгын бер башка күтәрде, әмма бик бәхәсле әсәр тудырды. Татар классигы әсәренә музыка аша шаман рухы керү күп тамашачыларның ачуын чыгарды. Шул музыка белән драманы биюләр аша ачарга тырышуны тамашачы аңлап бетермәде кебек. Шул ук вакытта, миңа калса, Россиянең “Алтын битлек” театраль премиясе лауреаты Нурбәк Батулла биюләр белән спектакльне җанландырды. Трагедияне хәрәкәтләр белән аңлатып, спектакльгә динамика өстәде.
