Минзәлә районында грипп белән авыру очрагы әлегә ачыкланмаган, ләкин бу тынычланырга сәбәп түгел

(Дифиза Нуриева, “Минзәлә-информ”)

Минзәлә районында грипп авыруы буенча вәзгыять ничек соң?

Әлеге сорау белән без район үзәк хастаханәсенең баш табиб урынбасары, табиб эпидемиолог Наил Асадуллинга мөрәҗәгать иттек. Ул безгә түбәндәге мәгълүматны бирде:

––2022 ел башыннан респиратор вируслы инфекцияләр белән авыруның 2426 очрагы теркәлде. Көз-кыш айларында авыручылар саны арту күзәтелә. Шушы вакыт эчендә 1202 кеше авырды, шуларның 425е – балалар. 2022 елда COVID-19 белән 1236 кеше авырды, шуларның 380-е балалар. Сезонлы грипп белән авыру очрагы әлегә ачыкланмады.