Минзәлә халкы мобилизацияләнүчеләргә гуманитар ярдәм җыюны дәвам итә

Илшат Вагыйзов, "Минзәлә-информ"

"Ялкын" яшьләр үзәгендә өлешчә мобилизациягә чакырылган якташлар өчен гуманитар ярдәм җыю дәвам итә. Бүген Минзәлә шәһәрендә яшәүче Сафура Әхмәдуллина чәй тартмалары, тушенка һәм йон оекбашлар белән тулы пакет алып килде.

"Төннәрен егетләребез өчен борчылып йоклый алмыйм. Күңел җылысы белән уртаклашасым килде", - ди ул.

"Ялкын" яшьләр үзәге директоры Ирина Михайлова хәбәр иткәнчә, бу якшәмбе Казанга әзерлек үтә торган мобилизацияле якташларыбызга бару планлаштырыла.  Егетләргә  Сафура ападан да, башка битараф булмаган минзәләлеләрдән дә күчтәнәчләр тапшырылачак.