Мәүлид – 2018: билгеләп үтү көне, традицияләр һәм үзенчәлекләр

Пәйгамбәребезнең туган вакыты милади исәпнең 571 елына туры килә. Мәүлид - рабигыләүвәл аеның 11-12нче көннәре арасындагы кичә.
Минзәлә мәчете имам-хатыйбы Рәмзил хәзрәт Садыков әлеге бәйрәм хакында түбәндәгеләрне сөйләде:
- Мәүлид кичәсенең (быел ул 19 ноябрь) аерым кыла торган гыйбадәте юк. Әмма бу көнне Пәйгамбәребез хөрмәтенә салаватлар уку, аның рухына багышлап догалар уку бик саваплы һәм мөһим эш була. Пәйгамберебезнең никадәр хөрмәткә ия икәнен аңлар өчен, Коръәннән: "Ий, Мөхәммәд, Без Сине галәмнәргә рәхмәт өчен генә җибәрдек" (Әл-Әнбия/Пәйгамбәрләр сурәсе, 21:107) аятен искә төшерү дә җитә. Бу көнне уразада үткәрү хәерле. Бер-береңә кунакка барып, әлеге бәйрәм хөрмәтенә ашлар үткәрү дә күркәм эш.
Иң мөһиме – шушы бәйрәм көнне бер-береңә мөмкин кадәр яхшылык эшләп калырга тырышырга, һәм шул ук вакытта Ислам дине һәрдаим бер-береңә ярдәм итешүгә чакыра икәнне онытмаска кирәк.