Узып баручы елның - Россиядә һәм Татарстанда әдәбият елының соңгы ае минзәләлеләрне тагын бер истәлекле бәйрәм белән сөендерде. Менә бер гасырга якын «Казан утлары» журналы әдәбиятыбыз һәм мәдәниятебез елъязмасы, әдәби җәүһәрләребезнең беренче бишеге булып тора. Әдәбият-сәнгатьне яратучыларны әдәби тормышка якынайтучы күпер ролен үтәүче бу журнал хезмәткәрләренең районның татар теле һәм...
Узып баручы елның - Россиядә һәм Татарстанда әдәбият елының соңгы ае минзәләлеләрне тагын бер истәлекле бәйрәм белән сөендерде.
Менә бер гасырга якын «Казан утлары» журналы әдәбиятыбыз һәм мәдәниятебез елъязмасы, әдәби җәүһәрләребезнең беренче бишеге булып тора. Әдәбият-сәнгатьне яратучыларны әдәби тормышка якынайтучы күпер ролен үтәүче бу журнал хезмәткәрләренең районның татар теле һәм әдәбияты укытучылары, Минзәлә педагогия көллияте, авыл хуҗалыгы техникумы, гимназия укучылары белән очрашулары матур традициягә әверелде (алар бер ай эчендә ике тапкыр очраштылар).
Сабир Өметбаев исемендәге Минзәлә татар дәүләт драма театры директоры Роберт Шәймәрданов һәм журналның баш мөхәррире Илфак Ибраһимов инициативасы белән театр бинасында уздырылган ике сәгатьлек кичә әдәбият-сәнгатькә, җыр-моңга сусаган минзәләлеләрнең йөрәгенә кереп калды. Моны Әдәбият елының финалы буларак кабул итәргә кирәк.
Чираттагы әдәби очрашуга мәртәбәле кунаклар, «Казан утлары» журналы хезмәткәрләре: баш мөхәррир Илфак Ибраһимов (Мөхәммәт Мирза), ТРның халык язучысы Марсель Галиев, журналның проза бүлеге мөхәррире Камил Кәримов, драматург, прозаик Данил Салихов, прозаик Алмаз Хәмзин, журналның проза бүлеге мөхәррире Айгөл Әхмәтгалиева килгән иде.
Г.Тукай премиясе лауреаты, шагыйрь Мөхәммәт Мирза үзенең мәхәббәт газәлләрен, тирән эчтәлекле робагыйларын укыды, прозаик Айгөл Әхмәтгалиева үзенең әдәбият дөньясына кереп китү тарихын бәян итте, Камил Кәримов мәзәк хәлләр сөйләп күңелләрне күтәрде, Марсель Галиев каләмдәшләре, чордашлары турына сөйләде (ахырда сөйләгән "Бәгырь авазы" шигырен халык аеруча ошатты), Данил Салиховны тамашачы драматург буларак кына түгел, җырчы буларак та таныды, ә ахырда Алмаз Хәмзин шаян җырлары, мәзәкләре белән сәхнә тотты.
Очрашу барышында Казан кунаклары безне күпкырлы иҗатлары белән таныштырдылар, әдәби осталыкларының кайбер серләрен ачтылар, иҗади хезмәттәшлеккә чакырып калдылар.
«Казан утлары» журналының киләчәк кыйбласы, алдагы саннарына күзәтүне, гомумән, республиканың әдәби-мәдәни барышы турында нәкъ менә журналның үз кешеләреннән ишетү бөтенебезгә дә кызыклы булды. Очрашу барыбызга да ошады. «Казан утлары» белән элемтәбез дәвамлы булсын, укучыларда милли үзаң, горурлык хисләре тәрбияләүдә уртак хезмәттәшлегебез ныклы булсын!
Иң мөһим һәм кызыклы язмаларны Татмедиа Telegram-каналында укыгыз
