Минзәлә чияләре

Минзәләгә язлар килә,

Ал таңнар, ак иртәләр.

Ак чәчәкле иртәләре

Бәхетләргә илтәләр.

Минзәлә чияләре

Ак күлмәк кияр әле.

Чәчәкле таңда гүзәлем

"Яратам", - дияр әле.

Минзәләгә җәйләр килә,

Чияләре кызара.

Чия алсулыгы күчә

Буй җиткән яшь кызларга.

Минзәлә чияләре

Ал алка тагар әле.

"Миңа бул", - дияргә иркәм

Кыюлык табар әле.

Минзәләгә көзләр килә,

Туй белән урам тулган.

Чия шәраплары белән

Мөлдерәмә тустаган.

Минзәлә чияләре

Шәлләрен эләр әле.

Сөюгә шаһит чияләр

Бәхетләр теләр әле.