Балалар янына, велосипед белән

Транспортлары булуга карамастан, күп кенә ата-аналар "Кояшкай" лагерендагы балалары янына велосипедларда баралар. Моның белән алар яшь минзәләлеләргә үрнәк күрсәтәләр. Мисал өчен, "Кояшкай" лагерына баручы юлда безгә шәһәребездәге бер оешма җитәкчесе Владимир Чернов очрады.

"Урман" чишмәсе бар минзәләлеләрнең дә диярлек яраткан ял итү урынына әйләнеп бара. Һәр көнне (кышын да,җәен дә) чишмәгә суга килүче дистәләгән шәһәрдәшләрне күрергә була. Ә чишмә янындагы территория спорт һәм актив ял итү өчен менә дигән урын. Аның янәшәсендәге трассада кыш көне чаңгычылар шуса, хәзер исә анда тимер атларының педальләрен әйләндерүче кешеләрне күрергә мөмкин. Сүзем, "Урман" чишмәсенә баручы юлны тутырып диярлек йөрүче велосипедистлар турында. Әлеге юлның велотрассага әверелүенә күп кенә машина йөртүчеләрнең ачулары да киләдер, мөгаен. Мондый "шумахер"ларга күптән түгел генә үз көченә кергән занонны искәртеп узасы килә: әгәр дә велосипедлар өчен махсус юл юк икән, велосипедист машиналар хәрәкәт итә торган юлдан йөрергә хокуклы. Кич белән үзем дә шул юлдан йөргәндә миңа балалары белән йөрүче дистәләгән ата-аналар, яшүсмерләр очрады. Барысының да теләкләре бер: велосипедлар һәм роллерлар өчен аерым юл булсын һәм автомобиль йөртүчеләр монда, саф һавада ял итүче кешеләргә, тотнаклык һәм сабырлык күрсәтсеннәр иде.

• Актив ял итәргә теләүче минзәләлеләр өчен велоюл булсын иде. Мин үзем велосипедта быел гына йөри башладым. Бу шөгылем миңа бик ошый. Мин велосипедта йөреп физик яктан да, рухи яктан да ял итәм. Табигать, тынлык, саф һава - болар барысы да шәһәр кешеләренә яхшы яктан гына тәэсир итә, - ди Лилия Гайнуллина.
• Автомобиль йөртүчеләр юл кагыйдәләрен саклап, тизлекне арттырмый гына йөрсеннәр иде. Без бит монда балалар белән йөрибез, шулай ук өлкәннәрдән башка йөрүчеләр дә очрый, - ди кызы белән велосипедта йөрүче Ангелина Фатхуллина.