Минзәлә
  • Рус Тат
  • Бәхетле булырга ярдәм кирәк

    Кичә социаль яклау бүлеге "Волонтер" иреклеләр үзәге белән берлектә авыр тормыш хәлендә калган гаиләләргә ярдәм йөзеннән Халыкара гаилә көненә багышлап район Мәдәният йортында "Игелек яктысы" хәйрия акциясе уздырды.

    Гаилә ул - әти-әни, ба­лалар - баш өстендә бер түбә, бер үк фамилияләр, озын, буыннан-буынга өзелмичә дәвам итүче тирән тамырлы нәсел җебе.

    Янәшәбездә бәхеткә төренеп, үзара аңлашып яшәүче гаиләләр бик күп. Алар һәр туган көнгә сөенеп, шатланышып го­мер итә. Әмма язмыш дигәнең һәркемгә дә ти­гез карамый шул. Арада авыр тормыш хәлендә, ачы хәсрәт утын йотып, чарасыз калган гаиләләр дә юк түгел.

    Нәбиуллиннар гаиләсе районыбызның Нарат­лы Кичү авылында яши. Зөлфирә ханым ялгызы ике бала үстерә. Улы Ай­нур Яр Чаллыда сәүдә-техник училищесында укый, ә кечкенә Айзирә Наратлы Кичү башлан­гыч мәктәбенең 1 сыйны­фында белем ала.

    Узган елның нояб-рендә Нәбиуллиннар гаиләсендә зур трагедия була - электр чыбыкла­рында килеп чыккан кыс­ка ялганыш нәтиҗәсендә янгын чыгып, гаилә йорт-җирсез кала. Гаилә баш­лыгы Илнур Мулланур улы янгында һәлак була. Зөлфирә ханым үзе дә бик озак хастахәнәдә ята. Кечкенә Айзирә бу вакытта күршеләрдә яши. Бүгенге көндә гаилә авылдашларының да­часында тора, алга таба кая барырга, кемгә сы­енырга? Зөлфирә барлык авырлыкларны җиңеп бара, рухын сындыр­мый, әмма аңа ялгызына бик авыр. Гаиләгә ярдәм кирәк.

    Шушы авылда тагын бер гаилә бар. Әхияр Мадия­ров гаиләсе ул. Алар Ра­ушания ханым белән бер ул тәрбиялиләр. Айнур Хуҗәмәт урта мәктәбе-нең 10 сыйныфында бе­лем ала. Укытучылары аны тырыш, максатчан булганы өчен яраталар. Айнур - күпсанлы олим­пиадалар, ярышлар при­зеры. Өстәвенә ул ел саен Татфондбанк оеш­тыра торган "Авылның 100 сәләтле баласы" конкурсы призеры да әле. Әмма гаилә баш­лыгы һәм Айнур авыру булу сәбәпле, Рауша­ния ханым эшли алмый, кадерлеләрен карый. Йортка ремонт кирәк, түбәне алыштырасы бар. Сәләтле баланың хыялы - компьютерлы булу, ин­тернет аша дуслар табу, мәгълүмат дөньясында гизү.

    Күпме гаилә - шулкадәр язмыш. Хисамовлар гаиләсе Яту авылында кечкенә генә йортта гомер кичерә. Өйгә газ кермәгән, утын ягып җылыталар, суны да китерергә кирәк. Гаиләдә дүрт бала тәрбияләнә: 13 яшьлек Фернандо, 10 яшьлек Энҗе, алты яшьлек Юлия һәм ике яшьлек Дима.

    Кайгы-хәсрәт агач ба­шыннан түгел, адәм ба­шыннан йөри, диләр бит. Узган җәйдә балаларның әниләре Фәизә печән өйгәндә егылып умырт­ка баганасын зарарлый. Бу вакыйга аның тор­мышын икегә бүлә. Алты ай дәвамында Яр Чал­лыда тернәкләнү курсын узганда балалар "Тур­гай" социаль приютында тәрбияләнәләр, кечкенә Дима балалар йортын­да була. Балалар бүген гаиләгә кайтарылган. Хуҗалык эшләрен башлы­ча тормыш иптәше Миха­ил башкара, балаларның өлкәнрәкләре дә йорт эшләрен башкарырга ярдәм итә.

    Инвалид коляскасында утыручы Фәизә ханым күз яшьләре аша моңа кадәр кичергән бәхетле гаилә тормышы турында искә ала. "Балаларым кызганыч, алар хакына мин яшәргә, көчле бу­лырга тиеш", -ди ул. Са­быйлары янәшәсендә, тормыш иптәше ярдәме белән ул рухын сындыр­маска тырыша. Ана кеше үзе кебек мөмкинлекләре чикләнгән танышла­ры белән телефон аша аралаша. Интернетка тоташтырылган ноут­бук булса, бәлки ул да мондый бәлагә тарыган кешеләр белән арала­шыр, балаларының да та­нып белү даирәсе киңәер, аларга укуда ярдәм бу­лыр иде.

    Алкиннар гаиләсе шә-һәребезнең Роза Люк­сембург урамындагы күпфатирлы йортта яши. Тулы булмаган гаилә башлыгы Эльмира Илду­совна интернат-мәктәптә тәрбияләнгән ятим бала. Бүген ул дүрт яшьлек ике игезәк бала тәрбияли, Кызганычка каршы, Дина­ра белән Данил икесе дә церебраль паралич авы­руыннан интегәләр.

    Яр Чаллы, Казан шәһәр-ләренең тәҗрибәле та­библары, "Умырзая" тернәкләндерү үзәге белгечләренең тырыш­лыгы белән Динара дүрт яшеннән үз аягында йөри башлаган. Киләчәктә аның мөстәкыйль йөри алуында өмет бар. Ә менә Данилның диагно­зы катлаулырак. Әмма дәвалауның нәтиҗәсе юк түгел, бала башын тота башлаган, каршылык күрсәтү рефлексы бар. Язмыш кушуы буенча шундый авыр хәлдә кал­ган Эльмира нарасыйла­рын тәрбияләргә үзендә көч һәм энтузиазм таба.

    Дәвалау процедуралары барышында һәрчак бала­лары янәшәсендә булган ана үзе дә өй шартла­рында төрле күнегүләр, массаж ясарга өйрәнгән. Әмма уңай динамика бул­сын һәм нәтиҗәләр ях­шырсын өчен тренажер­лар кирәк. Ялгыз ананың аларны сатып алырга мөмкинлеге юк, әлбәттә.

    Югарыда бәян ителгән гаиләләр язмышына сез дә битараф булмассыз дигән өметтә калабыз, хөрмәтле газета укучы­лар. Белешмәләр өчен телефоннар: 3-17-72, 3- 17-40.

    Нравится
    Поделиться:
    Реклама
    Комментарии (0)
    Осталось символов: