Бәяләр һаман “уйный”

12 ноябрь көнне без шәһәр үзәгендәге берничә кибеттә карабодай ярмасының булмавын язган идек инде. Ә 19 ноябрьгә исә әлеге кибетләрнең икесендә бу төр ярма сатуда бар иде. Зур супермаркетта 1 кг карабодай 59 сум 90 тиен торса (Чаллыда фасовать ителгән), кечкенәрәк кибеттә ул 64 сумга очрады. Ә ике сәүдә ноктасында карабодай юк иде. Дөге ярмасының килограммы уртача 40 сум.

Башка продуктларга килгәндә, Минзәләдә җитештерелүче икмәккә бәя арткан: кара ипи - 25 сум, ак ипи - 26 сум. Җылы яктан кайтучы кипкән җимешләргә, чикләвекләргә дә бәя арту күзәтелә. Ә менә грушалар 10 сумга очсызланган.

Александр Перушин, эшмәкәр, Яңа Маҗыннан килеп базарда ит сата :

-Иткә әлегә бәя күтәрелмәде. Сыер һәм дуңыз итенең килосын халыкка 240 сумнан сатабыз. Илдә барган икътисадый вәзгыять безне, эшмәкәрләрне, дә борчымый калмый әлбәттә. Безнең акчалар авыл хуҗалыгына салынган инде, ә андагы акчалар, әллә-ни табыш китермәсәләр дә, беркая да югалмаячаклар. Химияле ризыкка караганда авылдан китерелгән продукцияләрне сатып алырга кирәклеген аңлый башлады халык.

Резеда Сафиуллина:

-Базар тирәсендә кайнашкан кеше буларак, бәяләр белән кызыксынып торам. Чыннан да, кайбер продуктларга бәяләр бик нык артты. Шул ук карабодайны алыйк, бу ярманы кешеләр үзләре шушы хакка күтәрде дип әйтергә була. "Ярма бетә, ярма җитмәячәк" дигән уйдырма тудырып, ярыша-ярыша алдылар бит аны. Югыйсә, көн дә ашала торган ризык та түгел.

Илнур, Чаллы эшмәкәре, азык-төлек товарлары белән сату итә:

-Товарларга бәя артып тора. Бу атнада менә онга бәя артты, 20 сумнан сата идек, хәзер 22 сум 40 тиен булды. Чәй, шикәр комы да бераз кыйммәтләнде. Онга бәйле рәвештә макарон, кондитер эшләнмәләренә дә бәя үзгәрер дип уйлыйм. Карабодай ярмасына килгәндә, бу юлы мин аны алып та кайтмадым. Беренчедән, кыйммәт, поставщиклар куйган бәя үк 48 сум (килосы). Икенчедән, халык запас туплады бит инде, очсызрак булганда күпләп алып куйдылар.