Иркәнәшлеләр игелекләр кылып яшиләр

Иркәнәш мәхәлләсендә быелгы Рамазан аеның һәр көне бәйрәм кебек үтте.

Мәчеттә һәркөн фарыз, вәҗип, сөннәт һәм таравих намазлары укылды. Авыз ачу мәҗлесләре үткәрелде. Аеруча 23 нче июль көнендә, мең айдан да кадерле булган кадер киче мәҗлесе, мәчет тулы мөселманнар катнашы белән үтте. Укытучы Вәсимә Гәрәева ярдәме белән укучы балалар ата-аналарына, әби-бабаларына ислам диненең нигезләрен, Аллаһ Тәгалә, фәрештәләр, пәйгамбәрләр каршындагы бурычларын аңлаттылар. Намаз уку, ураза тоту кебек гыйбадәтләрнең әһәмиятен шигъри юллар белән төшендерделәр. Район күләмендә оештырылган дини олимпиадада җиңүче булган Алинә Галимова белән Ләйсирә Мингазовага район мөхтәсибе Җәүдәт хәзрәтнең бүләге - кесә телефоны тапшырылды.

Рамазан ае төгәлләнгәч, мәчеткә барып җәмәгать белән Гает намазы уку бик кадерле мизгел. Бу көнне иртәнге 6 тулганчы мәчет халык белән тулды, алар арасында өлкән буын гына түгел, яшьләр дә, яшүсмерләр дә бар иде. Намаз имам-хатыйп Рәис Кәбировның вәгазе белән башланды. Котлау сүзләре белән авыл ветераннар советы рәисе, депутаты Ягъфәр Хафизов чыгыш ясады. Ул мөфти Камил хәзрәтнең, район башлыгы Айдар Салаховның һәм район мөхтәҗсибе Җәүдәт хәзрәтнең котлауларын укыды. Ике рәкагать бәйрәм намазы укылды. Хөтбә сөйләгәннән соң мәхәллә әгъзалары Зөфәр Газизов, Рәзиф Салахов коръән сурәләреннән аятьләр укыдылар. Имам Рәис Кәбиров Рмазан аенда зәкять, гошер, фитр, нәфел садакалары бирүчеләрне исемләп атап чыкты, теләкләр теләде.

Намаз төгәлләнгәч, мәчеттә әзерләнгән бәйрәм ашы үткәрелде. Бәйрәм ашы үткәрүгә Рәзиф Салахов бер баш сарык, депутат Рәис Кашапов 2 мең сум, Фәйрүзә Фазлиева, Мирфаяз Мирзаянов, Рәмилә Галиева, Ягъфәр Хафизов 500әр сум акча, Шакуровлар гаиләсе 3 кг бал биргәннәр иде, башкалар да буш кул белән килмәделәр. Бәйрәм табынына Диләрә Зарипова, Гөлнара һәм Айсылу Кәбировалар, Элина Салахова бик тәмле аш-су әерләделәр.

Ашка дога кылганнан соң намазда катнашкан бар халык Иркәнәш зиаратына юл алды. Анда Имәнле авылына нигез салынганнан алып 1949 елга кадәр җирләнгән, әмма су басу зонасына эләгү сәбәпле, 1970 елда сөякләрен казып алып, Иркәнәш зиаратына күмелгән каберлекләр бар. Шушы каберлеккә рәшәткә һәм таш кую булды. Бу эшләр Рафаяз Каюмов тәкъдиме белән башланды, аның теләге тормышка ашты. Әлеге рәшәткәне авылыбыз кияве Мәгъсүм Фәттахов ясатырга вәгъдә иткән иде, ул сүзендә торды. Истәлек ташын ясатуны Илгиз Каюмов башкарды. Рәшәткәне көйләү, урнаштыру эшләрендә Илгиз Шакуров, Рәзиф Салахов, Кәшби Рафиков, Камил Миңнеханов, Гаяз Галимов һ.б.лар катнаштылар. Истәлек ташы куйганда Имәнле авылында туып үскән, бүгенге көндә Минзләдә яшәүче остабикә Кәнделҗинан Хәбибуллина бу каберлектә кемнәрнең җәсәде барлыгын аңлатты, авыл имамы Рәис Кәбиров киләчәк буынга вәсиятнәмәне укып чыкты һәм аны шешә эченә салып, таш астына урнаштырды. Аннан коръән укып, кабер ияләренә дога кылынды.