Укытучылар көне белән!

Татарстан халыкларының Дуслык йорты директоры, Татарстан Дәүләт Советы депутаты Ирек Шәрипов районыбыз мөгаллимнәрен бәйрәм белән котлый. "Минзәлә" мәгълүмат-мөхәррият үзәге почтасында укытучылар адресына килгән котлау телеграммасында мондый юллар бар:

-Хөрмәтле мөгаллимнәр, Сезне һөнәри бәйрәмегез - Укытучылар көне белән чын күңелдән тәбрик итәм!

Сез үзегезнең бөтен тормышыгызны киләчәк буынны тәрбияләүгә багышлап, ару-талу белмичә, вакыт белән исәпләшмичә, тырыш хезмәт куясыз. Бүген Минзәлә төбәгенең икътисади, иҗтимагый, сәяси һәм рухи тормышында күпләр сокланырлык матур үзгәрешләр бара икән - монда сезнең хезмәт йогынтысы да мөһим роль уйный. Сез укытып чыгарган меңәрләгән укучыларыгыз - Минзәлә төбәгенең эш сөючән матур халкы - биниһая авыр, әмма мактаулы хезмәтегезнең нәтиҗәсе ул. Сезгә алга таба да туган җиребезгә, халкыбызга хезмәттә рух күтәренкелеге, зур ихтыяр көче, яраткан хезмәтегездә уңышлар, имин көннәр телим. Бәйрәмегез котлы булсын!