Гүзәлия Исламова — «Ялгышулар, бәлки, кирәктер дә...»

Ялгышулар, бәлки, кирәктер дә...

Дөрес юлга чыгу өчен бу тормышта 
Ялгышулар, бәлки, кирәктер дә.
Гел ялгышмый, туры гына итеп
Баручылар ул бик сирәктер дә.

Хаталарсыз хатта язып булмый -
Тикшергән дә хата табыла.
Тормыш булгач була төрле хәлләр
Дүрт аяклы ат та абына.

Бик тә дөрес кебек тоеласың -
Ләкин тотка язмыш кулында.
Сынауларның әллә ниндиләрен
Ул әзерләп куя юлыңда.

Ялгыш арты ялгыш булып тора, 
Буталанып, адашып бетәсең.
Ә аннары барлык төеннәрне
Теш-тырнагың белән сүтәсең...

Тешең төшә, сына тырнакларың -
Дөрес юлга кирәк чыгарга.
Намусыңа тап төшермәс өчен 
Чыдарга да, бары чыдарга...

Гүзәлия Исламова.