Шагыйрә Сәхия Федотова (Авзалова) Татарстанның әдәби берләшмәләре очрашуында катнашты

«Минзәлә-информ» каршындагы «Сибелә чәчәк» әдәби-иҗат берләшмәсе вәкиле, Минзәлә шагыйрәсе Сәхия Федотова (Авзалова) «Иҗади учак җылысы» бәйрәмендә катнашты. Бу хакта «Минзәлә-информ»га «Сибелә чәчәк» әдәби-иҗат берләшмәсе җитәкчесе Наҗия Пучкова хәбәр итте.

Габдулла Тукай исемендәге Түбән Кама үзәк китапханәсендә узган бәйрәмгә Яр Чаллы шәһәре, Мөслим, Минзәлә, Түбән Кама, Алабуга, Чистай районнары, Кама Аланы бистәсе әдәби берләшмәләре вәкилләре чакырылган иде. Чара туган телне, әдәбиятны һәм мәдәниятне саклау һәм үстерү максатларында республика әдәби берләшмәләренең тыгыз хезмәттәшлегенә һәм берләшүенә юнәлтелгән иде.