1нче урта мәктәп укучылары «Россия бөркетләре» сафына кабул ителде

(Дифиза Нуриева, «Минзәлә-информ»)

Бүген 1нче урта мәктәптә башлангыч мәктәп укучыларын Россия бөркетләре сафларына багышлау тантанасы узды. Иң элек алар «Бөркет турында» дип исемләнгән фильм карадылар. Фильмнан алар бөркет кебек кыю рәвештә биектә очар өчен тугры дуслар, якты хыяллар һәм яхшы гамәлләр кылырга кирәк дигән фикер алдылар. 

Кунак буларак чакырылган район мәгариф бүлеге җитәкчесе Леонид Петраев балаларга үзенең теләкләрен җиткерде. Сыйныф җитәкчеләренең муеннарына «Россия бөркетләре» символикасы төшерелгән галстук бәйләде.

Югары сыйныф укучылары башлангыч мәктәп укучыларына «Россия бөркете» билгеләре һәм истәлекле бүләкләр тапшырдылар.

Проект районның барлык мәктәпләрендә дә тормышка ашырыла.