Аю авылы халкы Газада яшәүчеләргә гуманитар ярдәм җыюда катнашты

Илшат Вагыйзов, «Минзәлә-информ»

Минзәлә районы Аю авылы халкы Татарстанда игълан ителгән Газада яшәүчеләр өчен гуманитар ярдәм җыюда катнашты. Бу хакта «Минзәлә-информ» га Аю авыл җирлеге башлыгы Айрат Галимов хәбәр итте.

— Гуманитар ярдәм җыюны авылыбыз имам-хатыйбы Рәфкать хәзрәт Ялалов оештырды. Авыл халкы әлеге эшкә актив кушылды. Кирәк-яраклар белән беррәттән байтак кына акчалата да ярдәм җыелды, -диде ул.

Кичә Рәфкать хәзрәт (фотода) һәм Минзәлә район имам-мөхтәсибе Рәмзил хәзрәт Садыйков җыелган әйберләрне һәм акчаларны Казандагы гуманитар ярдәм җыю үзәгенә илтеп кайттылар. Рәмзил хәзрәт шулай ук Минзәлә шәһәрендә яшәүчеләрнең дә акчалата ярдәм күчерүләрен хәбәр итте.