Герой Евгений Касаткинның әнисенә улының дәүләт бүләген тапшырдылар

(Дифиза Нуриева, “Минзәлә-информ”)

Бүген Иске Матвеевка мәктәбенә Бөек Ватан сугышы герое, генерал-полковник Василий Гордов исеме язылган мемориал такта эленде. Әлеге тантаналы митингта Матвеевка авылның тагын бер герое, махсус хәрби операциядә вафат булган Евгений Касаткинны да зур хөрмәт белән искә алдылар.

Минзәлә районы хәрби комиссары Сергей Владимиров Евгенийның әнисе Валентина Петровнага улының дәүләт бүләген – “Орден Мужества” тапшырды.

Евгений Касаткин Иске Матвеевка авылында туып үсә. Шул авыл мәктәбендә белем ала. Аны укыткан укытучылары мәктәптә герой хөрмәтенә аның фотоларыннан торган эчтәлекле стенд ясап элгәннәр иде.

Евгений 2022 елның 31 августында үзе теләп хәрби операциягә китә һәм 8 октябрь көнне батырларча һәлак була.