«Ялкын» яшьләр үзәге хезмәткәрләре һәм волонтерлары мобилизацияләнүчеләргә ярдәм җыюны дәвам итәләр

Илшат Вагыйзов, “Минзәлә-информ”

 Октябрь аенда штаб эшли башлаганнан бирле, битараф булмаган гражданнар, предприятиеләр һәм учреждениеләр масскакүләм рәвештә гуманитар ярдәм алып киләләр, дип билгеләп үтте «Ялкын» яшьләр үзәге директоры Ирина Михайлова.

- Без госпитальләрдә дәваланучы хәрбиләр, «Тимер», «Алга», «БАРС» батальоннары өчен һәм, әлбәттә инде, өлешчә мобилизация буенча чакырылган якташларыбыз өчен әйберләр җыябыз. Гражданнар җылы әйберләр, озак вакыт саклана торган продуктлар, гигиена кирәк-яраклары һ.б. әйберләр алып киләләр. Луиза Токареваның "Кулинария" се безнең хәрбиләр өчен тәмле чәк-чәкләр әзерләде. Без инде танк училищесына бер тапкыр бардык, икенче атнада полигонга барырга планлаштырабыз, - дип сөйләде ул.

 «Ялкын» яшьләр үзәге волонтерлары һәм хезмәткәрләре мобилизацияләнүчеләр гаиләләре белән эшләү турында да онытмый.

- Мобилизацияләнүчеләрнең берсенең ялгыз әнисе калды. Мин аның янына үзем шәхсән барам, һәм без бу вакыт эчендә бик нык дуслашыр  өлгердек, - дип билгеләп үтә Ирина Михайлова.

Кайвакыт гадәти булмаган үтенечләр дә башкарырга туры килә икән. Әйтик, волонтерлар бер мобилизацияләнгән райондашыбызның үтенече буенча кызын 7 яшь тулуы  белән котлаганнар. Ә бер мобилизацияләнүченең йөргән кызын 25 яшьлек юбилее белән котлау өчен, хәтта Чаллыга да барып кайтканнар.