«Минзәлә АТП» ҖЧҖ призына ярышларга 554 йөзүче килде

Илшат Вагыйзов, «Минзәлә-информ»

Минзәлә шәһәренең «Юбилейный» спорт мәктәбендә «Минзәлә АТП» ҖЧҖ призларына йөзү буенча XIV республика ярышлары башланды. 
Традиция буенча, катнашучыларны һәм кунакларны сәламләп, «Юбилейный» спорт мәктәбенең аэробика бүлегендә тәрбияләнүче кызлар чыгыш ясады (тренерлары — Лилия Яруллина).

Спортчыларны ачылыш тантанасында Минзәлә районы Советы Аппараты җитәкчесе Аида Биктимерова сәламләде.

Ярышларны ачуның мәртәбәле кунагы аларның инициаторы һәм иганәчесе, «Минзәлә АТП» ҖЧҖ директоры Рамил Кәримов булды. Бер ел элек ул йөрәге кушуы буенча махсус хәрби операциядә катнашырга карар кылды. Катнашучыларга мөрәҗәгать итеп, ул аларга ярышларда лаеклы чыгыш ясауларын теләде.

Директор Илфар Сафиуллин үзенең сәламләү сүзендә ярышлар тарихы белән кыскача таныштырды, Рамил Кәримовка һәм аның энесе, «Минзәлә АТП» ҖЧҖ директоры вазыйфаларын вакытлыча башкаручы Марат Кәримовка Рәхмәт хатлары тапшырды һәм балалар иҗат йорты осталары ясаган картинаны бүләк итте. Шулай укРамил Кәримовка район хакимияте исеменнән «Ялкын» яшьләр үзәгенең тегү цехында тегелгән йокы капчыгы тапшырылды. 

Ачылышта башка бүләкләр дә тапшырылды. «Татарстан Республикасының физик культура һәм спорт отличнигы» күкрәк билгесе белән «Юбилейный» спорт мәктәбенең йөзү буенча тренер-укытучысы Анна Титова бүләкләнде. Йөзү бүлегеннән Зөләйха Нәбиевага «Йөзү буенча спорт мастерына кандидат» билгесе, ә Алексей Муриновка һәм Ангелина Кудряшовага «Йөзү буенча 1 спорт разряды» билгесе тапшырылды. Йөзү һәм волейбол буенча республика ярышларын оештыруда һәм үткәрүдә ярдәм иткәне өчен Минзәлә педагогика көллияте директоры Гөлназ Халиуллина Рәхмәт хаты белән билгеләп үтелде.
Ярышлар 3 көн дәвам итәчәк. Барлыгы 554 спортчы катнаша, Минзәлә данын 83 йөзүче яклый.