Минзәлә яр буенда уха фестивале узды

Быел Минзәләдә узган Кышкы уха — 2026 фестивале Хәрби батырлык һәм хезмәт фидакарьлеге елы Россия халыклары бердәмлеге елына багышланган иде.

Традиция буенча, чара кышкы балык тоту буенча ачык ярышлардан башланды. Ярышларның баш хөкемдары Олег Жучкин хәбәр иткәнчә, быел Минзәлә районыннан һәм Яр Чаллыдан 20дән артык балыкчы катнашты.

Сүз уңаеннан, нәкъ менә автоград вәкилләре команда зачетында призлы урыннарны яулады да инде: 1 урын — «КМБ — 24», 2 урын — «Закамье», 3 урын — «Трио».
Иң яхшы экипировкалы дип Марсель Гыйльманов, иң тәҗрибәле катнашучы буларак Марат Баһманов танылды, иң эре балыкны Марсель Мортазин, иң вак балыкны Камил Нургатин тотты, иң яшь катнашучы буларак Данил Фәттахов билгеләп үтелде. Ир-атлар арасында шәхси зачетта 1 урынны Ринат Харисов, 2 урынны Эмиль Абдуллин алды. Хатын-кызлар арасында 1 урынны Ирина Мусикова алды.

Ярышларда җиңүчеләрне Минзәлә районы башлыгы Айдар Салахов бүләкләде. Бәйрәм кунакларын сәламләп, Айдар Салахов балыкчылыкның Минзәлә районы территориясендә борын-борыннан традицион кәсепләрнең берсе булуын, җирле сулыкларның төрле балыкларга байлыгын билгеләп үтте.

Район башлыгы шулай ук балалар сәнгать мәктәбенең рәсем конкурсында катнашучыларны бүләкләде.

Фестивальнең үзенчәлеге авыл җирлекләре тарафыннан авыл мәдәният йортлары һәм клублары белән берлектә рус, татар, керәшен, мари һәм чуваш мәдәниятен тәкъдим итү булды. Алар көнкүреш әйберләре, традицион ризыклар, милли уха һәм һөнәрчелек әйберләре, шулай ук иҗади чыгышлар белән палаткалар оештырдылар. Районның мәдәният, мәгариф, социаль яклау, яшьләр эшләре һәм спорт бүлекләре вәкилләре уха әзерләү конкурсында катнашып, төрле номинацияләр буенча бүләкләнделәр.

Чара яшьләр өчен квестлар белән үрелеп барды. Мәктәп укучылары арасында 1 урында — 2 нче урта мәктәп, 2 урында — гимназия, 3 урыннны үзара 3 нче урта мәктәп, 1 нче урта мәктәп бүлештеләр. Урта һөнәри белем бирү йортлары арасында 1 нче урында — Минзәлә медицина училищесы командасы, 2 нче урында — Минзәлә педагогика көллияте, 3 нче урында — Минзәлә авыл хуҗалыгы техникумы.

Фестивальдә катнашучылар шулай ук үзләрен төрле мастер-классларда сынап карадылар, тәмле уха (бушлай сыйлауны «Татарстан» кафесы да оештырды), алкогольсез глинтвейн һәм милли ризыклар белән сыйландылар.

Бәйрәмнең махсус кунаклары — IDA & ЭСТЭТ төркеме популяр Россия башкаручыларының хитларының кавер-версияләрен тәкъдим итте. Район мәдәният сарае артистлары да иҗат номерлары белән чыгыш ясадылар.