Минзәлә командасы Республика пенсионерлар Спартакиадасында 2 нче урын алды

Казанда узган «Өченче буын» республика пенсионерлар Спартакиадасында Минзәлә районы командасы гомуми зачетта 2 нче урын алды. Әлеге ярыш кысаларында ГТО нормативлары тапшыру буенча минзәләлеләр шулай ук 2 урынга лаек булдылар.

Шәхси уңышларга килгәндә, команда җитәкчесе Фәния Григорьева өстәл теннисы буенча 1 урын, Андрей Гурьев 2 урын яуладылар. Йөзү буенча Зөлфия Мөсавирова 1, Рафис Мөбәрәкшин 3 нче урын алды. Атыш буенча Михаил Кукаркин — 3 урында. Җиңел атлетика буенча Радик Нәҗмиев 1 урын алды. 

— Үзләренең актив тормыш рәвеше алып барулары, җиңүләргә ирешүләре белән яшьләргә үрнәк күрсәтүче хөрмәтле спортсменнарыбыз белән горурланабыз, — дип хәбәр итте «Минзәлә-информ» га Россия Пенсионерлар берлегенең Минзәлә районындагы җирле бүлеге рәисе Алсу Ганиева.