Минзәләдә игезәк балалар тәрбияләгән әниләр белән очраштылар

Мәдәни мирас йортында «Көтелмәгән бәхет» дип исемләнгән игезәк балалы әниләр белән очрашу булып узды. 5 бала әнисе (шулар арасында игезәкләр Таһир белән Зөһрә), «Ана даны» медале иясе Илсөя Хәбибуллина, шулай ук 3 бала әнисе (икесе — игезәкләр Лиана белән Диана) Раушания Титова — Гыймаева чараның түрендә иделәр. Лениза Якиева үзенең игезәк оныклары (улы Илдарнын кызлары) Алина белән Аделина турында сөйләде. Чараны Роза Фәхретдинова әзерләде һәм алып барды.

Очрашуда педагогия көллияте студентлары, гимназия укучылары һәм әлеге уку йортларының директорлары Гөлназ Халиуллина, Лилия Галиева, «Сибелә чәчәк» ижади оешма җитәкчесе Нажия Пучкова катнаштылар. Районыбызның танылган шагыйрәсе Сәхия Авзалова чара барган чакта Раушания Титовага багышлап, иҗат иткән, өр-яңа шигырен укыды. Шулай ук чарада ветераннар советы вәкилләре, шәһәр мәчете мөгәллимәләре, шәкертләр катнашты. Очрашу ахырында чәй өстәле әзерләнде.