Минзәләдә район ифтары үткәрелде

Илшат Вагыйзов, «Минзәлә-информ»

Минзәлә гимназиясе бинасында үткәрелгән район ифтарына 100 дән артык мөселман җыелды.

— Ифтар үткәргән район җитәкчелегенә, безне барчабызны биредә кунак иткән гимназия коллективына чын күңелдән рәхмәтебезне белдерәбез. Ифтар ул ашау өчен генә үткәрелә торган мәҗлес түгел, ә барыбызга да бергәләшеп җыелышырга, аралашырга мөмкинлек бирүче күркәм чара да, — дип билгеләп үтте Минзәлә район имам-мөхтәсибе Рәмзил хәзрәт Садыйков.

Үз чыгышында ул шулай ук әдәп-әхлак, милләтара һәм динара татулык, иман темаларына кагылды. Махсус хәрби операциядә катнашучы якташларыбызның исән-имин әйләнеп кайтуын теләп һәм һәлак булганнарның рухларына багышлап дога кылды.

Гимназия спортзалында күмәкләшеп ахшам намазы укылды. Мәҗлес Тукай районыннан килгән кунак Сосновоборский бистәсе имам-хатыйбы Ринат хәзрәт Фәрраховның Коръән аятьләре укуы белән тәмамланды.

Исегезгә төшерәбез, 10 апрель көнне район мәчетләрендә Ураза гаете хөрмәтенә бәйрәм намазы укылачак.