Минзәләдә волейбол буенча районара турнир уза

Илшат Вагыйзов, “Минзәлә-информ”

Минзәләдә ир-атлар һәм хатын-кызлар командалары арасында волейбол буенча районара турнир башланды. Уеннар «Юбилейный» спорт мәктәбе (ир-ат командалары) һәм Минзәлә педагогия көллиятенең спорт залы (хатын-кызлар командалары) базасында уза. 

Бу турнирның дусларча характерын билгеләп үтеп, Минзәлә районының Яшьләр эшләре һәм спорт бүлеге җитәкчесе Фаяз Хизбуллин:

- Бүген күрше районнардан командалар җыелды. Әлбәттә, ярыш булгач, иң көчлесе җиңәчәк. Шул ук вакытта безнең барыбызны да күптәнге дуслык бәйләнешләре бәйли, һәм бүгенге очрашу – ул, беренче чиратта, волейбол бәйрәме, -диде.

Ир-атлар командалары арасында Минзәлә, Актаныш, Сарман, Мөслим районнары командалары ярыша. Беренче уен минзәләлеләр һәм актанышлылар арасында булды.

Ә хатын-кызлар командалары арасында Минзәлә районы  берьюлы ике җыелма команда белән тәкъдим ителгән: «Минзәлә» командасыннан тыш, «Нефтяник»та катнаша.

Алар Мөслим һәм Сарман районнарыннан килгән көндәшләре белән ярышалар.

Ярышларны үткәрергә Минзәләнең танылган эшмәкәрләре Егор Юдин һәм Александр Леванов ярдәм итте.