Минзәлә егете Зөлфәт Нәбиев генерал-полковник Андрей Сердюковтан мактау грамотасы алды

(Дифиза Нуриева, “Минзәлә-инфом”)

Хәрби автомобильчеләр көне уңаеннан гвардия рядовое Зөлфәт Нәбиев хәрби һава десанты командиры генерал-полклвник Андрей Сердюков кулыннан грамота ала. Әлеге грамотага ул “һөнәр осталыгы, тырышлыгы, хезмәттә аерылып торуы, акыллы инициативасы, үҗәтлеге һәм таләпчәнлеге, вазыйфаи бурычларны үтәгәндә күрсәткән аерым шәхси казанышлары” өчен лаек була.

Зөлфәт Нәбиев кечкенәдән үк куйган максатына ирешүчән егет булып үсә. “Юбилейный” спорт мәктәбенең йөзү секциясенә йөреп әлеге спорт төре буенча спорт мастерына кандидат нормативын үти. Армия хезмәтенә дә үзе теләп китә. Хәрби һава десантының элиталы гвардия полкына эләгү өчен Казан шәһәрендә парашюттан сикерү буенча махсус курслар уза, берничә тапкыр парашюттан сикерә, йөк автомобилен йөртү өчен “С” категориясенә укып, права ала.

Ватан алдындагы бурычларын намус белән башкарган Зөлфәт кебек үрнәк егетләребез районыбыз горурлыгы булып тора.