Минзәлә районында наркотиклар таралуга каршы тору буенча киңәшмә узды

(Илшат Вагыйзов, “Минзәлә-информ”)

Татарстан Республикасының наркотикларга каршы комиссиясенең утырышы видеоконференция режимында булды. Утырыш барышында Яшел Үзән районында наркотиклар таралуга каршы тору буенча эшчәнлеге каралды. Балигъ булмаганнар арасында наркотик чаралар белән мавыгуны булдырмауга аерым игътибар бирелде.

ВКС тәмамланганнан соң Минзәлә районы башкарма комитеты җитәкчесенең социаль мәсьәләләр буенча урынбасары Нэля Бикеева:

- Районда наркоманиягә каршы тору айлыгы үткәрелде, әмма без шуны онытмаска тиеш: бигрәк тә балигъ булмаганнар арасында эш бер ай гына түгел, ә ел дәвамында алып барылырга тиеш, - дип билгеләп үтте.

Киңәшмәдә катнашкан Минзәлә РҮХнең психиатр-наркологы Илдар Иламанов район уку йортлары укучыларына наркотикларга бәйлелек булу-булмауга тест үткәрү кирәклеге турында искә төшерде. Шулай ук ул районда наркотикларга бәйлелек буенча учетта торучы балигъ булмаганнар юк, дип хәбәр итте.