Минзәлә шәһәренең 1 нче урта мәктәбен 4 укучы медаль белән тәмамлады

(Дифиза Нуриева, “Минзәлә-информ”)

Быел 1 нче урта мәктәпнең 11 нче сыйныфын 19 бала тәмамлады. Аттестат алу тантанасына чыгарылыш укучылары белән беррәттән аларның укытучылары, әти-әниләре, район үзәк хастаханәсенең баш табиб урынбасары Наил Асадуллин, Никольский соборы настоятеле Роман атакай, районның спорт һәм яшьләр бүлеге җитәкчесе Фаяз Хизбуллин да килгән иде. Алар укучыларга изге теләкләрен җиткерделәр.

Ольга Ильина, мәктәп директоры:

–Бүген без 19 чыгарылыш укучыбызны олы тормыш юлына озатабыз. Алар арасында 4 медалистыбыз булу мәктәп өчен генә түгел, район өчен дә зур горурлык. Эвелина Гафурова, Даниил Дудяк, Алсу Рахманова, Аделя Ардыханова барлык фәннәр буенча бишле билгеләренә генә укып, мәктәпне кызыл аттестат белән тәмамладылар. Шулай ук укучыларыбыз спортта да сынатмады. 19 укучының 16 сы – ГТО нормативларын алтын билгегә тапшырды. Чыгарылыш кичәсендә аларга алтын значоклар тапшырылды.