Минзәләдәге Татарстан халыклар фестиваленең зональ этабында Иске Матвеевка мәктәбе җиңде

(Минзәлә, Илшат Вагыйзов, “Минзәлә-информ”) Минзәлә шәһәренең 2 нче мәктәбе базасында Татарстан халыклар фестиваленең зональ этабы узды. Абсолют җиңүче булып, гран-прига лаеклы дип керәшеннәрнең йолаларын музыкаль-тематик тамаша аша күрсәткән Иске Матвеевка мәктәбе командасы танылды. Директорлары Лилия Миңнекаева үзе дә катнашкан, тере гармун тавышына барган чыгыш һәркемгә ошады.

- Мәктәбебездә укучы төрле милләт балаларын бербереңне хөрмәт итү, туган телләрне кадерләп саклау юнәлешендә тәрбиялибез, - диде ул “Минзәлә-информ” га интервьюда.

Шулай ук 1 нче дәрәҗәле диплом белән 1 нче урта мәктәп (казах халкы традицияләрен күрсәттеләр), 2 нче - Кадрәк мәктәбе (татар халкы) , 3 нче – Николаевка мәктәбе (грузин халкы) бүләкләнде.

Бәйгедә җиңүчеләрне котлап, Минзәлә район башкарма комитеты җитәкчесенең социаль мәсьәләләр буенча урынбасары Нэля Бикеева:

- Мондый фестивальләр районыбыз халкын кечкенедән үк янәшәбездә яшәүче төрле милләт вәкилләрен хөрмәт итәргә, берберебезнең милли традицияләрен өйрәнергә этәрә. Бирегә килеп, үзләренең чыгышларын күрсәткән һәр мәктәп вәкилләре мактауга лаек, - дип билгеләп үтте.

Калган мәктәпләр дә аерым номинацияләр буенча бүләкләнделәр. Фестиваль кысаларында катнашучылар тарафыннан алар тәкъдим иткән халыкларның милли киемнәре, йорт кирәк-яраклары, кулинариясен чагылдырган өстәлләр дә әзерләнгән иде.

Шулай ук чарага махсус кунак рәвешендә  Татарстан Республикасы Экология һәм табигать ресурслары министрлыгы Кама буе территориаль идарәсенең әйдәп баручы белгече Ләйлә Галимова да килде.