«Сабантуй» журналы Минзәлә гимназиясендә кунакта

Бу килү очраклы гына түгел иде, чөнки гимназиянең башлангыч сыйныф укучыларының барысы да «Сабантуй» һәм «Салават күпере» журналларына бик теләп язылалар. Кунакларны милли киемнәрдән киенгән укучылар татар халкының милли ризыгы чәкчәк белән каршы алдылар. Һәм әти-әниләр ярдәме белән, башлангыч сыйныф укучылары көзге байлыкка багышлап, сый — хөрмәттән сыгылып торган табын әзерләделәр. Анда нинди генә нигъмәтләр юк иде: пирог, бәлеш, компот, кайнатма, как, желе һәм бик күп төрле камыр ризыклары. Шунысы куанычлы: һәр сыйныфтан укучылар матур итеп, саф татарча шигырен сөйләп, җырын җырлап, кунакларны каршы алды. 

Очрашу барышында кунакларыбыз да укучыларның белемнәрен сынап карарга өлгерделәр. Укучыларга мәкальләрне дәвам итү, табышмакларга җавап табу белән бергә, фразеологик берәмлекләрнең дә мәгънәсен аңлатырга туры килде. Укучылар сынатмады һәм биремнәрне бик тиз башкарып чыктылар. Кунаклар да буш кул белән килмәгәннәр. Балаларга «Сабантуй» журналы белән бергә истәлекле бүләкләр дә калдырып киттеләр.

Исегезгә төшерәбез: 1 - 11 октябрьдә "Минзәлә" район газетасына арзан хакка язылырга мөмкин! Ташламалы ункөнлектә почта бүлекләренә мөрәҗәгать итегез.