Тырышып эшләгәч, бурыч тиз үтәлә

(Илдус Шаһиев, «Минзәлә- информ»)

Чокырлар алдан әзерләп куелгач- бу хезмәтне электр челтәрләре хезмәткәрләре башкарган, үсентеләр әзерләп куелгач- урманчылар үз питомникларыннан биргән, агач утыртырга килүчеләр күп булмаса да, эш гөрләп барды.

Марат Кәримов, район башкарма комитеты җитәкчесе:

-Бүгенге акциядә катнашучы һәркемгә рәхмәт. Кичә мәгариф бүлеге хезмәткәрләре Җиңү паркында исемле аллея утырттылар. Быел биш меңгә якын үсенте утыртырга исәплибез. Шуңа акция турында хәбәр иткәч, һәркем катнашырга тырышсын иде.

Чынлап та, агач утырту физик хезмәт кенә түгел, ә киләчәктә үзебез сулаган һаваның чисталыгын тәэмин итү. Якындагы трассадан машиналар йөреше күбәйгәндә , шәһәргә алар чыгарган зарарлы матдаләрдән аз гына фильтр булачак бу агачлар.

Агач утыртуга багышланган безнең видеоны да карагыз.