Хуҗәмәт авылыннан махсус хәрби операциядә катнашучы Илнар Сагиров Сабантуйдагы яшь көрәшчегә махсус бүләк әзерләгән

(Дифиза Нуриева, «Минзәлә-информ»)

Илнар Сагиров бүгенге көндә туган авылы Хуҗәмәттән бик еракта — махсус хәрби операция барган зонада алгы сызыкта хезмәт итә. Март аенда авылда — әти-әнисе янында була, сәламәтлеген ныгыта. Савыккач, кабат хәрби бурычын үтәргә киткән вакытта үз исеменнән Сабантуйга дип бүләк калдырып китә. Һәм менә милли бәйрәмгә бүләк җыйган вакытта әти-әнисе Илнарның бүләген тапшыра.

Резеда Сагирова, хәрбинең әнисе:

—Улыбыз Илнар кечкенәдән үк спорт белән мавыгып үсте. Авылда узган Сабантуйда һәрвакыт көрәшә иде, җиңү яулап, бүләккә тәкә алган вакытлары да булды. Бүгенге көндә кайнар ноктада хезмәт итә. Аның исән-имин кайтуын, телефон аша шалтыратуын зарыгып көтәбез. Улыбыз өчен борчылабыз да, горурланабыз да: бер медале бар иде, шушы көннәрдә тагын бер медаль тапшырганнар үзенә. Илнарның хыяллары әле бик күп: Ходай кушып, исән-имин кайтса, көрәш турнирлары да үткәрергә исәбе бар үзенең.

Бүгенге көндә махсус хәрби операциядә хезмәт итүче тагын бер Хуҗәмәт егете Рәмис Галиевның әти-әниләре Ринат һәм Әлфия Галиевалар да улларының исән-сау кайтуын теләп, Сабантуй уздыру өчен 5мең сум акча тапшыралар. Шулай ук махсус хәрби операциядә хәрби бурычын үтәгән вакытта геройларча һәлак булган авылдашлары Руслан Газизовның да әти-әнисе Сабантуйга бүләк рәвешендә 5 мең сум акча бирә.

Фотода Хуҗәмәт авылында Сабантуйга бүләк җыю мизгеле. Илнарның әнисе Резеда һәм әтисе Минзаһит Сагировлар бүләк тапшыра. 

Материал Хуҗәмәт авылы китапханәчесе Гөлфинә Әминова ярдәме белән әзерләнде.