Югары Тәкермән авыл җирлегендә ир-егетләр хоккей уйнады 

(Рөстәм Хәкимҗанов, “Минзәлә –информ”) 
Тәкермәнлеләр хоккей җанлы халык. Бүгенге уенда да бу ачык күренде. Ир-егетләрнең барысы да тимераяк киеп, кулларына кәшәкә алып, үз команадсы өчен уйнарга җан атып торды. Ә ике авыл командасының уеннарын хөкемдар - укучылар командасы капкачысы Лилиана Хаҗиева бәяләп барды. Нәтиҗәдә, Югары Тәкермән ир-егетләре командасы көчлерәк булып чыкты. Кубок хуҗаларда калды. 
Әлеге уеннарның иганәчесе – фермер Нәсим Дәүләтов.
Югары Тәкермән авыл җирлеге башлыгы Алия Шәрипова: 
- Бүгенге җылы очрашуны уздыруда ярдәм иткәннәре өчен Дәүләтовлар гаиләсенә, мәктәп коллективына, Мәүҗиевләр гаиләсенә,  Илдар Асадуллинга һәм авыл яшьләренә зур рәхмәтләребезне җиткерәсем килә. Киләчәктә дә шушындый матур очрашулар дәвамлы булсын, сау-сәламәт булып киләсе очрашуларга кадәр.