Бәя ничек туа

Июль аенда аракы һәм шикәр комының бәясе 1,1-1 процент­ка арткан. Бүген соңгысының бәясе 36-38 сумнар тирәсендә тирбәлә. Тавык ите - 0,9, бодай оны - 0,5, беренче һәм икенче сортлы бодай оныннан пешкән күмәчнең бәясе 0,4 процент­ка күтәрелгән. Минзәлә ба­зарында йорт шартларында үстерелгән бройлер чебинең килограмммы 220 сум тора.

Карабодай, тары ярмалары арзанайган. Туңдырылган ба­лык, сыр бәясе 0,1 процентка кимегән, яшелчәләрнеке арт­кан. Аерым алганда, кишер, суган бәясе 2,5-2,8 процентка үскән - бүген суганның кило­сы 25-26 сум, кишернеке -20- 22 сум булса, кәбестәнеке тагын да югарырак - 30 сум. Сарымсакның бәясе ни өчендер беркайчан да төшми дияргә була - килосы 150 сум, баллы борычның бәясе дә юга­ры - 35-40 сум.

Җитештерүчеләрдән сатып алу бәяләре җәй көне шак­тый кимесә дә, халык яратып ала торган сөт продуктларына бәяләр элеккечә кала. Онга бәяләр беренче тапкыр июнь аенда артты - 14 сумнан 18 сумгача күтәрелгән иде. Бүген "Аверс" кибетендә "Макфа" сортлы 2 кг лы он 65(!) сум тора. Июль аенда китерелгән югары сортлы онның килосы 21 сум булган.

Күмәртәләп алучыларга икмәк ризыклары бүгенге бәядән җибәрелә икән, икмәк-булка эшләнмәләре җитештерүче предприятиеләр хезмәткәрләргә хезмәт хакын да, салымнарны да түли алма­ячак. Чимал сатып алуда да кы­енлыклар булачак. Бу исә пред­приятие эшчәнлеген туктатуга китерәчәк. Җитештерүчеләр фикеренчә, бәяне 3-10 про­центка арттырырга кирәк.

Безнең республикада да аш­лык алдан фаразланганча түгел. Авыл хуҗалыгы һәм азык-төлек министрлыгыннан алынган мәгълүматлар буенча, быел тулаем җыем 3,4 миллион тонна чамасы булыр дип план­лаштырыла. Аграр министр Марат Әхмәтов фикеренчә, август аенда социаль бәядән сатылучы ипигә бәя артма­ячак. Ай дәвамында күрше төбәкләрдәге вәзгыятьне өйрәнеп, ипи бәяләренә җентекле мониторинг уздыры­лачак.

Белгечләр ипи бәясе генә түгел, ашлыкка бәя арту иткә дә йогынты ясарга мөмкин, диләр. Иткә бәя арту де­кабрь - гыйнвар айларында күзәтелергә мөмкин. Бүген исә сыер итен 230 сумнан, дуңгыз итен 170-185 сумнан саталар. Чагыштыру өчен - Чаллыда сыер итенең килограммы - 260-270 сум.