Гөлшат Зәйнашевага багышланган фестиваль быел Минзәләдә 7 нче тапкыр үтте

Гөлшат Зәйнашеваның кияве Рафаэль Шакирьянов инициативасы һәм химаячәлеге канаты астында үтүче фестиваль быел да Югары Тәкермән авылыннан башланды. Казаннан килгән кунаклар һәм район башлыгы Айдар Салахов Гөлшат апаны карап үстергән Махия апаның каберен зиярат калдылар, Югары Тәкермән мәктәбе укучылары белән очраштылар, Югары Тәкермән авылы җирлегендәге “Гөлбакча” паркында алмагачлар утырттылар. 
Фестивальнең төп өлеше Минзәлә татар дәүләт драма театры бинасында үтте. 
Фестиваль ел саен үзенең географик рамкаларын киңәйтә бара, быел фестивальгә Татарстан Язучылар берлеге рәисе Данил Салихов, Татарстан Мәдәният министры урынбасары Эльвира Камалова да килгән иде, алар үз чыгышларында   фестивальгә  зур бәя бирделәр. Югары Тәкермән авыл җирлеге башлыгы Алия Шәрипова инициативасы белән, бу фестивальне үткәрүгә районы Советы хатын-кыз депутатлары берләшмәсе “Мәрхәмәт” зур көч куйды. Аерым алганда, күрше районнарда да аларның коллегалары сайлап алу турларын үткәрделәр. Нәтиҗәдә, Минзәлә сәхнәсендә Актаныш, Мөслим, Сарман, Тукай, Менделеевск районнарыннан килгән талантлар да чыгыш ясады.
Фестиваль барышыннан фотогалереяны һәм видеорепортажны соңрак тәкъдим итәрбез.