1 августта Минзәлә районында яшәүче тыл хезмәтчәне, хезмәт ветераны Фәния Фатыйховага 94 яшь тулды

Бөек Ватан сугышы елларында, әле үсмер чагында ук, фермада төрле эшләрдә хезмәт куйган. 13 яшендә аны өлкәннәр белән бергә урман кисәргә җибәрәләр. Соңрак фермада савымчы булып эшли.

Хезмәт елларында Фәния Миңнеәхмәт кызы авыл Советы депутаты итеп тә сайлана. 1956 елда тормышка чыгып, гаиләсе белән Минзәлә районының Югары Тәкермән авылына күчә. Лаеклы ялга чыкканчы колхозда төрле эшләрдә эшли һәм савымчы булып хезмәт итә.

Күпьеллык намуслы хезмәте өчен Фәния Миңнеәхмәт кызы «1941–1945 еллардагы Бөек Ватан сугышында фидакарь хезмәт өчен» медале белән бүләкләнгән. Шулай ук аңа күпсанлы Рәхмәт хатлары һәм Мактау грамоталары тапшырылган.

Фәния Фатыйхова тормыш иптәше белән дүрт бала тәрбияләп үстергән.