Кадрәк авыл җирлегендә булдыклы, тату яшәүче гаиләләр бик күп

8 июль көнне Кадрәк авылы мәдәният йортында Гаилә, мәхәббәт һәм тугрылык көне уңаеннан "Бергә яшәүләре- олы бәхет" дигән зур кичә уздырылды.

Бу бәйрәмне зурлап оештырдылар,чөнки Кадрәк авыл җирлегендә яхшы итеп, озак еллар дәвамында кулга-кул тотынып яшәүче гаиләләр бихисап. Бу җирлектә 25,30,35,40,45,50,55 ел бергә гомер иткән 18 гаилә яши. Альбина һәм Владимир Гарнышевлар, Нурия һәм Вәсил Хәсәншиннар, Илүсә һәм Фәнил Гыйлаҗевлар, Гөлсинә һәм Радик Сафиуллиннар, Рәйсә һәм Мирзаян Хәбибуллиннар, Гөлсәрия һәм Азат Солтановлар, Гүзәлия һәм Расих Биктимеровлар, Мөнҗия һәм Касыймхан Миңнемөхәммәтовлар, Зинаида һәм Михаил Казанцевлар әлеге бәйрәмгә килгәннәр. Аларны туганнары, балалары, дуслары юбилярларны котлап бүләкләр һәм Гаилә,мәхәббәт һәм тугрылык символы булган ак ромашка чәчәкләре тапшырдылар. 55 ел бергә гомер иткән Казанцевларга район башлыгының Рәхмәт хаты һәм кыйммәтле бүләк белән район башкарма комитеты җитәкчесенең социаль мәсьәләләр буенча урынбасары Нурһади Гыйльфанов бүләкләде.

Бәйрәмнең иң кульминацион ноктасы Рәйсә ханым һәм Мирзаян Хәбибуллиннарга "Тугрылык һәм мәхәббәт" медале, Диплом, кыйммәтле бүләк һәм район башлыгының Рәхмәт хатын тапшыру булды. Әлеге бүләкне район ЗАГСы җитәкчесе Анна Куприянова һәм Нурһади Гыйльфанов тапшырдылар.

Кадрәк авыл җирлеге башлыгы Хәлил Нәбиуллин:

-Безнең җирлектә уңган, тырыш, булдыклы гаиләләр бик күп, аларга бәхетле, матур тормыш телим, гаиләләр ныклы булсын, яхшы, тәрбияле балалар үстерергә язсын, оныклар бәхетен күрергә кирәк, иң мөһиме илебездә тынычлык хөкем сөрсен. Авылдагы гаилә бәйрәме үзешчән артистлар чыгышы белән үрелеп барды.

Район ЗАГС бүлеге начальнигы Анна Куприянова:

- РФнең "Тугрылык һәм мәхәббәт" медале 25 елдан артык тормыш корып, бергә яшәгән үрнәк гаиләләргә һәм өч һәм аннан да артык тәртипле,тәрбияле бала үстереп, аларны олы тормыш юлына бастырган районда елга бер тапкыр иң үрнәк гаиләгә бирелә. Быелгы шундый медальнең бишенчесенә Кадрәктән Хәбибуллиннар гаиләсе (фотода) лаек булды.

Сан.

Минзәлә районында 50, 55, 60 һәм аннан да күбрәк бергә яшәүчеләрнең саны 150дән артык.