Хуҗамәт авылында спорт мәйданчыгы төзелә

Бу спорт мәйданчыгы нәкъ авыл уртасында, мәктәп яны территориясендә төзелә башлады. Башта төзүчеләр мәйданчык буласы урынның чүбен тазартып, җирнең өслеген алдылар.  Аннары 50 сантиметр калынлыкта грунт, балчык, ком түшәделәр. Шуның өстенә 7 сантиметр калынлыкта бетон җәйделәр. Баскетбол уйнар өчен баскетбол кәрҗине куйдылар.  Хәзер ясалма чирәмне җәясе калды. Бу универсаль спорт мәйданчыгын 2 метр биеклектәге металл сетка белән әйләндереп алачаклар. Мәйданчыкның киңлеге-18, буе-30 метр тәшкил итә. Әлеге спорт корылмасы төзелеп беткәч волейбол, баскетбол, мини футбол уйнарга була. Бу спорт корылмасының генераль подрядчигы “Татлизинг” ҖЧҖ, субподрядчысы Татавтодар АҖнең Минзәлә районы юлчылары.