Минзәлә балыкчылары быел 120 тонна балык тотачак

Минзәлә балыкчыларына үзләренә беркетелгән участокларда браконьерларга каршы көрәшергә, сулыкларны, яр буе территорияләрен һәм утрауларны контрольдә тотарга тиешләр. Законсыз станнарны ачыклау һәм күзәтчелек органнарына законсыз корылмалар турында хәбәр итү дә аларның бурычына керә.

Республикабыз, шул исәптән Түбән Кама сусаклагычы сулыкларында законсыз куелган ятьмәләр һаман очрый. Күзәтчелек органнары  узган ел  сулыкларда законсыз куелган 5 мең ятьмәне алганнар. Браконьерлар тарафыннан табигатькә китерелгән зыян миллионнар белән исәпләнә. 

Медицина нормалары нигезендә, кеше елына 23 килограмм балык ашарга тиеш.. ТР Биологик ресурслар буенча Дәүләт комитеты мәгълүматларына караганда, безнең республикада ул җан башына 9 килограмм туры килә. Алдагы елларда бу күрсәткеч 18-20 килограммга җиткереләчәк. Белгечләр фикеренчә, әлеге нәтиҗәләргә ирешергә мөмкин, чөнки моның өчен Татарстанда бөтен шартлар да бар,дип саный алар.

 ТР Биологик ресурслар буенча Дәүләт комитетының узган елгы эш нәтиҗәләре һәм агымдагы елга бурычлар турындагы коллегия утырышында да сүз шушы һәм биоресурсларны саклауга кагылышлы башка мәсьәләләр турында барды.