Минзәләлеләр Изге Болгар җыенына 2 автобус белән бардылар

(Илшат Вагыйзов, “Минзәлә-информ”)

Изге Болгар җыены быел халкыбыз тарихындагы иң мөһим вакыйгаларның берсе - Идел буе Болгар дәүләте тарафыннан ислам динен кабул итүнең 1100 еллыгына багышланган иде. Тарихи вакыйганың масштабына туры килеп оештырлыган тантананы үз күзләре белән күрергә Минзәлә районыннан рекордлы санлы делегация барды – барлыгы 82 кеше. Ветераннар советы, инвалидлар һәм сукырлар җәмгыятенә дә 20 кешелек квота бирелгән иде.

Рәмзил хәзрәт Садыйков, Минзәлә районы имам-мөхтәсибе:

- Идел буе Болгар дәүләтенең ислам динен кабул итүенә 1100 еллык уңаеннан чарага 80 ннән артык кеше баруы – районыбыз өчен зур күрсәткеч. 2 автобус биреп, әлеге чараны үз күзләре белән күрергә теләгән райондашлар өчен Болгар җиренә барырга мөмкинлек тудырганнары өчен район җитәкчелегенә рәхмәт әйтәсебез килә.