Минзәләлеләрнең экология өлкәсендәге ялынычлары

Шунысын әйтергә кирәк, минзәләлеләрнең экология өлкәсендәге киңәш-табыш итәсе гозерләре аз түгел иде. Әтрәкле авыл җирлеге башлыгы Рөстәм Газизянов Рус Мөшеге авыл янындагы “Шифа” чишмәсенә район халкы гына түгел, тирә-як районнардан да күп йөриләр, дип аның бүгенге торышы турында сөйләде. Чишмәгә йөрүчеләр күп, хәзер аны төзекләндерү таләп ителә, проекты да бар, саллы средстволар таләп ителә, дип экология буенча проблеманы кузгатты.

“Минзәлә районы Коммуналь челтәрләр”АҖ директоры Расим Габдрахманов шәһәрнең Элеватор һәм Садак микрорайоннарындагы, шулай ук шәһәрнең иске өлешендәге канализация һәм суүткәргеч челтәрләрен киңәйтү зарурлыгы турында глобаль проблема торуын аңлатты, шушы мәсьәлә буенча экологларның ярдәм итүен сорады.

Коноваловка авыл җирлеге башлыгы Сәрия Билалова Коноваловка авылында чистарту  корылмасы төзелеше буенча алларында колачлы эш торуын, аны башкарып чыгуда ярдәм таләп ителүен сөйләде.

Район башлыгы урынбасары Наил Хисамбиев экологларга зур габаритлы һәм төзелеш чүп-чарын ташуга бәйле мәсьәләнең район һәм шәһәр җитәкчелеген генә түгел, барлык минзәләлеләрне борчыган иң кискен мәсьәлә булуы турында сөйләде. Ул шулай ук Бикбау авыл җирлегендә Ык елгасы буенда балыклар үрчетү һәм төзелеш өчен елга буендагы территорияне арендага алуга бәйле мәсьәләне күтәрде. Шәһәр башкарма комитеты җитәкчесе Рамил Ягафаров район хаҗәтләре өчен грунт, ком алу өчен карьер рәсмиләштерүдә экологларның теләктәшлек күрсәтүләрен сорады. Менә шушы мәсьәләләр буенча гозерләрен җиткерде минзәләлеләр экологларга. Очрашу эшлекле шартларда үтте, анда күтәрелгән мәсьәләләрнең берсе дә игътибардан читтә калмаячагы әйтелде, аңлатмалар, киңәшләр бирелде, кайберләре буенча тиешле министрлыкларга хат әзерләргә кушылды.