«Олимпиец» лагеренда балаларга юл хәрәкәте кагыйдәләрен искә төшерделәр

Балалар янына Минзәлә районы буенча «Юл хәрәкәте иминлеге» дәүләт бюджет учреждениесенең профилактика бүлеге җитәкчесе Наталья Железкова килде.

Гадәти лекция урынына балаларга интерактив формат тәкъдим ителде. Наталья Юрьевна белән бергә алар юл хәрәкәте турында мультфильмнар карадылар, төрле юл ситуацияләрен анализладылар һәм геройларның хаталарын тикшерделәр. Балалар сорауларга актив җавап бирде, үз белемнәре белән уртаклашты һәм төрле юл шартларында дөрес эш итәргә өйрәнде.

Очрашу барышында укучыларга урамда хәвефсез йөрүнең төп кагыйдәләрен, светофор сигналларын үтәүнең мөһимлеген, яктылык кайтаргыч элементлар куллануны һәм юл аша чыкканда игътибарлы булу кирәклеген искә төшерделәр.

Мондый профилактик чаралар балаларга юл хәрәкәте кагыйдәләрен яхшырак үзләштерергә һәм үз иминлекләренә җаваплы караш тәрбияләргә ярдәм итә.