"2009-2015 нче елларга Россия Федерациясендә телерадиотапшырулар үсеше" Федераль максатчан программасы нигезендә республикада «цифрлы» телерадиотапшыруларны оештыру эшләре 2010-2011 нче елларда ук башланган иде.
Цифрлы эфир телевидениесе халыкка югары сыйфатлы каналларның санын арттыру мөмкинлеге бирә. Бушлай ТВның беренче пакетына "Первый канал", "Россия 1", "Россия 2", Россия 24", "Россия-Культура", "Карусель", "НТВ", "Канал 5" керә. Әлеге исемлеккә "Региональный канал" һәм "Канал общественного телевидения" каналлары да өстәлде. Беренче этапта, узган елда, Казанны тоташтырдылар. Анда цифрлы телевидение 1 марттан бирле даими режимда эшли. Агымдагы елда шундый ук "цифра"лы тагын ун пункт эшли башлаячак. Шундый пунктларның берсе - Яр Чаллы телерадиоүзәге, чөнки бу тирәдә тапшыру зонасы да киң, халык та күп яши. Бер ел элек биредә антенна-мачта корылмаларны реконструкцияләп, капиталь ремонт уздырганнар. Октябрь аеннан турыдан-туры антенна хуҗалыгын реконструкцияләү эшләре балып барыла. Мачтада антенналар күп булу сәбәпле, бу гамәлне башкарып чыгу җиңел түгел. Бүгенге көндә гамәлдә булган "Первый канал", "Россия" каналлары өчен мачтаның иң югары ноктасына яңа антенна урнаштырганнар инде. Ә бу ике канал моңа кадәр тапшырган урында цифрлы телевидение өчен цифрлы антенна урнаштырылачак. Моның өчен 13 катлы антеннаны сүтеп, аның урынына 12 катлысын урнаштырырга кирәк булачак. Нәкъ шул эшләр башкарыла да инде бу көннәрдә. Передатчик урнаштырылган, иярченнән цифрлы пакетны кабул итү өчен антенна постлары да куелган. Шушы көннәрдә передатчикның үзен көйләү һәм тоташтыру эшләре башкарылачак. Шушы эшләргә бәйле рәвештә, телевизион каналлар белән эфирны вакытлыча туктатып тору вакыты да килешенгән. Әйтик, "Россия" телеканалы 8-18 сәгатьләрдә туктатылып торса, "Первый канал" исә 17 сәгатькә кадәр эшләми. Якшәмбе көннән кала бу вакытларда барлык тапшырулар да тукталып тора. Бу вакыт аралыгында иске антенналарны сүтүче махсуслаштырылган оешма белгечләре эшли. Җиһазлар комплектланган, тапшыруларны өзеп тору вакыты 26 декабрьгә кадәр дип билгеләнгән. Шушы вакыт эчендә яңа антенналар куелып, Яңа ел бәйрәменә цифрлы телевидение карау мөмкинлеге туачак.
Дружба авылында да киләсе елда цифрлы передатчик куелачак, ә бу планның дүртенче этабы. 2013 нче елда 60 лап телетранслятор куелачак. Барлык район үзәкләре дә якындагы трансляторлардан цифрлы тапшырулар кабул итәчәк. Безнең зонага Тукай, Минзәлә, Актаныш, Мөслим, Сарман, Менделевск һәм Әгерҗе районнары керә. Берничә урында "ноктасы" булган районнарда өстәмә телетрансляторлар куелачак. Бүгенге көндә Дружба авылы янында нибары бер радиоканал - "Болгар" радиосы гына эшли. Цифрлы телевидение урнаштыру өчен 50 метрлы телебашня куелачак, ә телетранслятор, һичшиксез, Минзәлә янәшәсендә булачак.
2015 нче елга кадәр аналоглы һәм цифрлы телевидение параллель рәвештә 32 каналны күрсәтәчәк. Шушы вакыт эчендә халык тапшырыла торган каналларның сыйфатына, мөмкинлекләренә тиешле бәя бирер, аларны кабул итүне җайга салыр. Телевизор сатып алганда игътибарлы булырга кирәк - аның һичшиксез DVB-Т2 функциясе булырга тиеш, чөнки Россия тулысы белән шушы стандартка күчә, ә инде бу функция юк икән, приставка (ресивер) сатып алырга туры киләчәк, соңгысы очсызракка төшә.
Иң мөһим һәм кызыклы язмаларны Татмедиа Telegram-каналында укыгыз
