Калморзаның кукурузы шәп үскән

«Әнәк» агрофирмасының Мөшеге бүлекчәсендәге көзге бодай басуын суктыруны төгәлләделәр. Биредәге басуда 12 берәмлек комбайн ашлык суктырды. «Заиковский» хуҗалыгында арпа суктыралар. «Калморза» хуҗалыгыда кукуруз басулары бик яхшы күренә, кукурузның биеклеге 2,5 метрга җитә. Идарә белгечләре «Мензелинские зори» агрофирмасы басуларындагы эшләр белән дә танышты, биредә көзге бодай басуында 7 комбайн игеннәрне суктыра. Илфар Халиков хуҗалыкларда урактан тыш көзге чәчүгә туфрак әзерләү, терлек азыгы хәзерләү минераль ашлама туплау мәсьләләренә игътибарны юнәлтте. Илфар Халиков авыл җирлекләре башлыклары белән дә очрашты, аларга хуҗалыклар белән килешеп җирлек халкына пай җирләре өчен ашлыкны сентябрь башына биреп бетерергә кушты. 

Илфар Халиков фикеренчә, районыбыз хуҗалыкларында бөртекле-кузаклы культуралар, шикәр чөгендере, рапс, көнбагыш басуларының торышы бик яхшы. Басулар әлегә мул уңыш вәгъдә итәләр.