«Минзәлә – информ» һәм 2 нче мәктәп яшь экологларының зур дусты Владимир Мозаффаров вафат булды

(Илшат Вагыйзов, “Минзәлә-информ”)

Татарстан Экология һәм табигый байлыклар министрлыгының Кама буе территориаль идарәсенең элеккеге әйдәп баручы белгече Владимир Макарович Мозаффаров вафат булды. «Минзәлә-информ» га бу күңелсез хәбәрне 2 нче урта мәктәпнең география укытучысы Рушания Зиязиева җиткерде.

- Безнең мәктәп Владимир Макарович белән 2017 елдан 2021 елга кадәр тыгыз хезмәттәшлек итте. Аның белән конференцияләр, семинарлар үткәрдек. Ул безнең эко-дәресләргә еш кына кунак рәвешендә килә иде. Кызганычка каршы, соңгы вакытта авырый иде, - диде Рушания Рәҗәп кызы.

Шунысын да билгеләп үтәргә кирәк, Владимир Мозаффаровны «ТАТМЕДИА» АҖ филиалы «Минзәлә-информ» белән дә дустанә элемтәләр бәйләде. Күп еллар дәвамында «ТАТМЕДИА» АҖ филиалы «Минзәлә-информ» тарафыннан эшләнгән батарейкаларны җыю буенча оештырылган акцияне хуплап кабул итте. Ә 2019 елда үзе дә “Минзәлә –информ” тарафыннан батарейкалар җыю буенча үткәрелгән чарада турыдан-туры катнашты, ул көнне 202 килограмм батарейкалар җыелып утильләштерүгә җибәрелде.