Минзәлә районында әзербайҗан һәм таҗик милли-мәдәни берләшмәләре җитәкчеләре билгеле булды

(Илшат Вагыйзов, “Минзәлә-информ”)

Минзәлә районы Тауасты Байлар авылында үткәрелгән милләтара һәм конфессияара мөнәсәбәтләр мәсьәләләре буенча ведомствоара эшче төркемнең күчмә утырышында таҗик һәм әзербайҗан милли-мәдәни берләшмәләре җитәкчеләре билгеле булды. Аларның исемнәре һәм биографияләре белән Минзәлә районындагы Халыклар дуслыгы йорты методисты Наилә Кәлимуллина таныштырды.

Әзербайҗанлылар милли-мәдәни берләшмәсен Наргиз Чингиз кызы Ахмедова (1 нче төп фото) җитәклиячәк. Ул 1993 елның 13 июлендә Әзербайҗан Республикасы Тауз районы Ашагы Ойсюзлю авылында туа. 4 яшендә гаиләсе белән Минзәлә шәһәренә, Татарстан Республикасына күчеп киләләр. 2016 елның октябреннән башлап Минзәлә район мәгариф бүлегендә методист булып эшли.

Таҗик милли-мәдәни берләшмәсен шулай ук мәгариф өлкәсендә хезмәт куючы Адиба Саидова (2 төп фото) җитәклиячәк. Ул 1976 елның 1 ноябрендә Таҗикстан Республикасы Худжанд шәһәрендә туган. Россия Федерациясенә 2010 елда күченеп килә. 2014 елдан Минзәлә шәһәре 11 санлы “Шатлык” балалар бакчасында тәрбияче булып эшли.

Сан

Минзәлә районында бүгенге көндә якынча 5 әзербайҗан гаиләсе, 40 таҗик яши.

Безнең өстәмә

Моңа кадәр Минзәлә районында татар, рус, мари, чуаш, керәшен, әрмән  милли-мәдәни берләшмәләре, хутор казаклары җәмгыяте эшчәнлек алып бара иде инде. Хәзер аларга таҗик һәм әзербайҗан милли-мәдәни берләшмәләре өстәлде.