Тулай җыем 125 мең тоннадан артты

Бу планлаштырылганның 74,8 проценты дигән сүз. Барлыгы 125868,3 тонна икмәк амбарларга кайтарылды. Район буенча бер гектардан чыккан уртача уңыш 44,9 центнер тәшкил итә. Ә республика буенча һәр гектардан уртача 39,5 центнер уңыш җыеп алына. Кичә район кырларында 23 комбайн хезмәт куйды. Район хуҗалыкларының 8 нче сентябрьгә сабан бодае — 9142, карабодай −137, бөртек өчен кукурузны — 100 гектарда суктырып аласы калды. «Калморза» хуҗалыгы уракны тәмамлау алдында тора, хуҗалыкның 98 процент урагы төгәлләнгән. Бу хуҗалык 1955 гектар рапсның 680 гектарын суктырып алды, әлегә гектар төшеме 22,9 центнер тәшкил итә. Район буенча рапсның һәр гектарыннан уртача 20 центнер уңыш чыга.