Илнур Габдрахманов 1998 елның 2 мартында Алабуга шәһәрендә дөньяга аваз сала. Гаиләсе белән Минзәлә шәһәренә күченеп кайта һәм гимназиягә укырга керә. Хәзерге вакытта Илнур Актаныш районында урнашкан гуманитар гимназия-интернатта 8нче сыйныфта укый. - Илнур, бу гимназиягә ничек килеп эләктең? Аның ачылуын каян ишеттең? - Бу гимназия 2011 елда ачылды. Бер...
Илнур Габдрахманов 1998 елның 2 мартында Алабуга шәһәрендә дөньяга аваз сала. Гаиләсе белән Минзәлә шәһәренә күченеп кайта һәм гимназиягә укырга керә. Хәзерге вакытта Илнур Актаныш районында урнашкан гуманитар гимназия-интернатта 8нче сыйныфта укый.
- Илнур, бу гимназиягә ничек килеп эләктең? Аның ачылуын каян ишеттең?
- Бу гимназия 2011 елда ачылды. Бер көнне, иртәнге аш вакытында радиодан сәләтле балаларны өндәүче бер игълан ишетеп алдым. Актанышта сәләтле балалар өчен бер уку йорты ачалар, шуңа укучылар җыялар. Мин дә үземнең көчемне сынап карарга булдым. Әңгәмәне уңышлы үттем һәм гимназиягә укырга килдем.
- Мондый гимназиягә эләгү өчен кайсы өлкәдә сәләтле булырга кирәк? Гомумән, син нәрсә белән шөгыльләнәсең?
- Сәләтле балалар дигәч тә, ул "4", "5" билгеләренә генә укучылар түгел, бар яктан да җитез булырга кирәк. Мин үзем бию белән мавыгам. Минзәләдә укытучым Роза Биктаһирова иде. Аның белән безнең бию төркемебез Парижга барып кайтты. Анда бөтен Рәсәйдән җыелган бию осталары арасыннан без дүрт беренче урынга лаек булдык һәм гран-при оттык. Биюдән башка мин физика һәм химия фәннәренә күп вакытымны багышларга тырышам, чөнки шул өлкәләрдә үземне көчлерәк дип саныйм. Гомумән, күпкырлы эшчәнлек белән шөгыльләнәм: рәсем дә ясыйм, көрәштә дә көчемне сынап карадым, фәнни-гамәли конференцияләрне калдырмаска тырышам.
- Гимназиядә көнегез ничек уза? Төп дәресләрдән башка нәрсә белән шөгыльләнәсез?
- Төп дәресләрдән соң өстәмә дәресләр башлана. Түгәрәкләр дип әйтсәк, дөресрәк тә булыр. Күңелең теләгәнен сайла, алар саны дистәләгән. Иҗади, спорт, фәнни, чит телләрне өйрәнү түгәрәкләре эшләп килә. Мин үзем гарәп һәм инглиз телләрен өйрәнү түгәрәгенә йөрим. Әлбәттә, биюне ташламыйм, гимназиядә гимнастика юнәлешенә тирәнрәк кереп киттем. Хәтта район буенча үткәрелгән гимнастика ярышларында беренче урынны яуладым.
- Җәйге лагерьда ял итеп кайттыңмы? Сәләтле балаларның ялы ничек уза?
- Тулаем ял итәргә бардык дип әйтә алмыйм, чөнки төрле күңел ачу чаралары белән беррәттән интеллектуаль уеннар да үткәрелде. 10 көн дәвамында безнең белән Мәскәү, Чаллы шәһәрләреннән килгән профессорлар шөгыль-ләнделәр. Мәсәлән, бер көнне дебат рәвешендә көч сынашсак, икенче көнне мастер-класста катнаштык. Мин үзем химия һәм биология фәннәренең мастер-классларына кердем.
Иң мөһим һәм кызыклы язмаларны Татмедиа Telegram-каналында укыгыз
