Минзәләнең 1 нче урта мәктәбе укучылары “Онытмаска иде үткәнне...” спектаклен елый-елый карады

(Дифиза Нуриева, “Минзәлә-информ”)

Сугыш... Күпме сабыйның язмышына үтеп кереп, өмет-хыялларын чәлпәрәмә китергән, балачак бәхетеннән мәхрүм иткән. Аларның бала чаклары булмаган да диярлек, чөнки алар сугыш чоры балалары. Ятимлек ачысын да татыганнар, ачлык белән дә күзгә-күз очрашканнар. Тик тормышта никадәр авырлыклар күрсәләр дә, алар сынмыйча-сыгылмыйча яшәүләрен дәвам итә. Ә күңелләрендә бергенә теләк: "Сугышлар кабатланмасын".

Резеда Фаррахова, 1 нче урта мәктәпнең татар теле укытучысы:

–Без балалар белән берлектә яшүсмерләр өчен, татар шагыйрьләре иҗатына нигезләнеп эшләнгән сугыш турында тәрбияви патриотик мини-спектакль карадык.Әлеге спектакль балаларның күңелләренә нык үтеп керде. Алар кызыксынып карадылар. Соңыннан мәктәптә балалар белән әсәр эчтәлеге буенча сөйләшү булды. Укучылар  кичергән хисләрен сөйләделәр, хәтта күбесе:"Мин елап карап утырдым "-диделәр.